Cebuano Will

"LET THERE BE LIGHT" Ministries

Ang Imong Gahum Sa Pagpili

First printing, 1995

“Let There Be Light” Ministries (rs)

www.LightMinistries.com

Alang sa dugang impormasyon o balasahon pulihug sulat lang sa:

ALBANY, OR 97321

Ang Imong Gahum Sa Pagpili

Unsa man ang KABUBUT-ON? Si Mrs. E. G. White miingon:

Steps to Christ (SC), p 47: “Kini (ang Kabubut-on) mao ang gahum nga nagdumala sa kinaiya sa tawo, gahum sa paghukom, o pagpili. Ang tanan naga agad sa husto nga aksyon sa kabubut-on.”

Ang kabubut-on mao ang atong gahum sa pagpili, sa paghimog mga desisyon, ug mao usab ang gahum sa pagdumala, a kusog sa atong kinaiya.

Kanus-a nato gamiton ang kabubut-on? Ginagmit kini sa tanang dula sa kinabuhi. Wala kita’y mahimo kon wala kita’y kabubut-on. Gikan sa pagmata nato sa buntag hangtud sa pagkatulog nato sa kagabhion, kanunay natong ginagamit ang atong kabubut-on aron sa paghimo ug mga desisyon. Busa atong makita nga ang atong kinabuhi napuno sa lain-laing mga pagpili ug mga aksyon nga atong ginabuhat. Kon kanunay atong balikbalikan pagbuhat ang usa ka aksyon mahimo na kining naandan o batasan ug segun sa lain-lain natong kinaiya maporma ang atong karakter.

Christ Object lesson (COL) p. 356: “Siya nagalihok tumong sa mga prinsipyo nga maandan na niya. Mao nga ang gibalikbalik nga aksyon nahimo nga kinaiya, ang kinaiya nahimong karakter, ug pinaagi sa atong karakter ang atong padulngan karon ug sa walay katapusan mahukman na.

That I may Know Him (TMK) 141: “Ang mga pulong ug mga aksyon maoy moporma sa karakter.”

Busa, mahimo kitasumala sa atong gipili. Kon pilion natong magporma ug dautan nga kiniya, moani kita sa walay katapusang pagkalaglag. Apan kon pilion natong magporma ug maayo, matarung nga kinaiya, nan, moani kitag kinabuhing dayon. Alang kanato, ang pagpahimulos sa walay katapusang pagpabilin diha sa kiliran sa atong Hari ug maloyloyong Manluluwas maoy walay katumbus nga kalipay. Busa si Sister White, miingon nga “Ang tanang butang naga agad sa husto nga aksyon sa kabubut-on.”

Atong lili-on si Adan sa wala pa siya magpakasala. Ang Diyos miingon, “Buhaton nato ang tawo sama sa atong hulagway.” Gen. 1:26.

Patriarchs & Prophets (PP) p. 45: “Gitaguhan ang tawo sa pagdala sa hulagway sa Diyos, duroha ka pagkamay-ong sa gawas ug sa karakter.”

Letter 69, Feb. 7, 1897 (MR #701, p. 11): “Wala gilalang ang tawo aron kini luwason, kon dili aron siya maghambin sa Iyang hulagway.”

COL 355: “Gillang sa Diyos ang tawo aron nga ang tanang kaakuhan mahimo unta nga kaakuhan sa diosnong panghunahuna.

Daw unsa ka solemne nga panghunahuna kini! Gilalang sa Diyos ang tanang tawo dinhi sa kalibutan nga adunay mga kaakuhan nga kon kini maayong pagkagalam ug pagkagamit, makahimo kanila sa pagpadayag sa diosnong panghunahuna sa tanang lihok nga ilang pagahimoon.

Hingpit ba sa Adan sa dihang gilalang siya? Oo. Gilalang ba siya kauban ang usa ka hingpit ug kumpleto nga karakter? Wala.

SC 62: “Makahimo unta si Adan sa pag umol sa usa ka matarung nga karakter, sa wala pa siya mapukan pinaagi sa pagtuman sa kasuguan sa Diyos. Apan napakyas siya sa paghimo niini, ug tungod sa iyang sala ang atong pagkatawo napukan...”

Sa dihang gilalang si Adan ang iyang kinaiya dili hingpit tungod kay wala pa kini maumol. Apan gihatagan siya ug kahigayunan ug kaukulan sa pag umol ug paghingpit niini pinaagi sa pag gamit sa iyang kabubut-on sa paghimo ug mga hustong desisyon, matarung nga aksyon, pagumol ug matarung nga kagawian, aron nga sa ingon niini maporma ang hingpit ug matarung nga karakter.

Walay nagtulod kang Adan sa pagpakasala apan libre siya sa pagtugyan sa iyang kabubut-on ngadto kang satanas ug pagpili sa pagpakasala kon buot niya. Ug makasusubo kay mao kini ang gipili niyang buhaton.

Tungod sa sala ni Adan, ang tawhanong kinaiya napukan ug nahimong makasasala, puno sa yawan-ong kailibgon ug mga tinguha. Ang tawo nakabaton ug makusog nga hilig sa pagpadayon sa pagpakasala, nga unta wala siya niini. Kon ang tawo pagatentalon sa pagpakasala, ang iyang hulog nga kinaiya, kauban sa tanang yawan-ong kagustuhan ug mga hilig, motulod kaniya sa pagtugyan ngadto sa tentasyon samtang ang iyang konsyensya magaawhag kaniya sa pagbatok sa tentasyon ug pagbuhat sa maayo. Adunay gubat sa sulod niya-kon magpakasala ba siya o mobatok ba hinoon sa tentasyon ug mosunod sa Diyos. Ki? Nagakahulugan nga ang tawo mapugos sa paggamit sa iyang kabubut-on kon unsang dalan ang iyang pagasundon.

Sa human malaglag ang tawo unsay nahitabo sa atong kabubut-on?

5T p. 515: “Kini nga kabubut-on, nga nag-umol sa labing mahinungdanong bahin sa kinaiya sa tawo, gihatag ngadto sa kontrol ni satanas sa dihang napukan ang tawo; ug sukad kaniadto siya nanlimbasug nga ang tawo magabuot ug magahimo alang sa iyang kaugalingon nga kalipayan, apan ngadto sa hingpit nga kagun-oban ug kagul-anan sa tawo.”

Busa, tungod niini wala gayud kita’y kahigayunan nga makadaug sa sala. Magpadayon kitang kulang sa kusog ug gahum sa ato lamang nga kaugalingon, sa pagbatok sa mga pagsulay, ug dili nato mapugngan ang atong kabubut-on ni malugos nato kini sa pagsunod sa dalan sa pagdumili ug sa pagdaug. Kanunay natong masapnan ang atong kaugalingon nga nagpakasala ug mipili sa pagpakasala bisan ug dili pa unta nato gusto. Si Apostol Pablo miingon.

Roma 7:18-19, 22-24: “Kay nahibalo ako nga walay maayo nga nagapuyo sa sulod nako, nga sa ato pa, sa sulod sa akong lawas, ania kanako ang pagtinguha sa maayo, apan dili ako makabuhat niini. Kay dili ako mobuhat sa maayo nga gitinguha ko; mao hinooy ginabuhat ko ang dautan nga wala ko tinguhaa.” 22-24: “Kay sa kinasuloran sa akong pagkatawo ginakalipay ko ang kasugoan sa Diyos, apan dinhi...”

Ang paglaum sa tibuok katawhan ana-a ra sa tabang sa Diyos.

Education p. 29: “Ang resulta sa pagkaon sa kahoy sa kahibalo sa maayo ug dautan makita sa matag kasinatian sa tawo. Ana-a sa iyang pagkatawo ang hilig sa pagkayawan-on, usa ka gahum nga kon walay panabang dili gayud siya makadaug. Aron sa pagbatok niini nga gahum, aron sa pagkab-ot nianang kalab-oton nga gidawat nga takus sa kahiladman sa iyang kalag, matabangan lamang siya sa usa ka gahum...”

Apan dili mapasaylo lang sa Diyos ang tawo ug ang iyang sala tungod kay kini magpamatuod nga ang silot walay kapuslanan, ug ang sala matugotan nga mabuhi sa walay kapuslanan, ug ang sala matugotan nga mabuhi sa walay katapusan. Usa ra gayud ang paagi aron sa pag guba sa pag-angkon ni satanas ug pag-ulipon kanato ug pagluwas sa katawhan. Kini mao nga ang tawo mopili nga mag kinabuhi siya nga dili magpakasala sa tibuok niyang kinabuhi - kanunay siyang magpakiggubat, mag pakigbisog ug magpakig-away batok sa halos magmadaugon nga kalibgon sa hulog nga kinaiya sa tawo; kanunay niyang pugson ang iyang kabubut-on sa pagdaug sa tanang mga tentasyon pinaagi sa pagsalig sa Diyos. Mao ra kini ang paagi nga magun-ob ang pagkontrol ni satanas sa atong kabubut-on ug sa iyang pag-angkon kanato. Kini magpamatuod nga ang balaod sa Diyos balaan, husto ug maayo, ug nga mahimong tumanon nga hingpit sa katawhan. Walay lain nga paagi aron maluwas ang tawo gikan sa pagkaulipon kang satanas ug sa sala.

Selected Messages, bk. 1 (LSM) p. 340-41: “Ang pagkamatarung nagamando nga ang sala dili lang pagapasayloon, apan ang silot sa kamatayon kinahanglan ipatuman. Ang Diyos, pinaagi sa gasa sa iyang bugtong nga anak, nakatuman niining duha ka kinahanglan. Tungod sa Iyang pagpakamatay alang sa tawo, gihaw-as ni Kristo ang silot ug nag gahin siya ug kapasayloan.

“Tungod sa sala ang tawo nahibulag gikan sa kinabuhi sa Diyos. Ang iyang kalag ninggahi tungod sa pagmaneho ni satanas, ang nagsugod sa sala. Sa iyang kaugalingon, dili siya makahimo sa pagtalikod sa sala, dili siya makahimo sa pag-ila ug pagpahimulos sa diosnong kinaiya. Bisag ipaduol pa kini kaniya, ang iyang tawhanon nga kasingkasing walay ganang moambit niini. Ang madanihon nga gahum ni satanas ana-a kaniya. Ang tanang yawan-ong pagtakuban ni satanas ipresentar diha sa iyang hunahuna aron maalihan ang maayo niyang tinguha. Ang tanang kaakuhan ug gahum nga gihatag kaniya sa Diyos gigamit ingon nga hinagiban batok sa langitnong Mangginhatagon. Busa, bisan ug gihigugma siya sa Diyos, dili siya bahinan sa mga gasa ug panalangin nga buot unta ihatag sa Diyos kaniya.

“Apan ang Diyos dili magpadaug kang satanas. Gipadala Niya ang Iyang Anak dinhi sa kalibutan, nga pinaagi sa iyang pagpakatawo, ang tawhanon ug diosnon naipon diha Kaniya, aron ikatuboy ang tawo nga may bili sa timbangang moral sa Diyos.

“Wala gayo’y laing paagi alang sa kaluwasan sa tawo.”

Gi-unsa ni Kristo pagdaug si Satanas?

Hebreohanon 2:16-18: “Kay sa pagkatinuod dili alang sa mga manolunda ang iyang kahingawa, kondili alang sa mga kaliwat ni Abraham. Busa gikinahanglan nga pagahimoon siya nga sa tanang kahimtang mahisama sa iyang mga igsoon, aron mahimo siyang maloluyon ug kasaligang labawng sacerdote diha sa pagpang-alagad alang sa Diyos, sa paghimog halad-pasiuli alang sa mga sala sa katawhan. Kay maingon nga siya gayud nakaantus man sa diha nga gitintal siya...”

Si Kristo nag-antos tungod kay gitental Siya. Ngano man nga nagantos Siya, tungod sa mga tentayson, kon wala pa unta niya gidala ang hulog nga pagkatawo? Dili ba sayon ra kaayo ang pagdumili sa sala, kon walay gikan sa kahiladman nga gugma sa pagpaksala? Oo, unya ngano man nga nag-antos man Siya sa dihang miduol ang tentasyon?

Santiago 1:14: “Hinonoa ang matag-usa ka tawo matintal sa diha nga madaldal ug mahaylo siya sa iyang kaugalingong pagpangibog.”

Ang tawo ginatental kon ang kagustuhan ug kailibgon sa sulod sa iyang pagkatawhanon magatulod, magapakig-away ug maghagit kaniya sa pagbuhat niana nga sala. Kini nga pagbati iya sa hulog nga kondisyon sa tawo.

Busa, gikinahanglan nga ang atong Manluluwas magtabon niining maingon nga kanaiya, maingon nga hulog, makasasala, tawhanon nga kinaiya sama kanimo ug kanako, aron nga siya mahimong tentalon, apan makadaug Siya.

Hebreohanon 4:15: “Kay ang atong labawng sacerdote dili siya usa nga dili arang mobati sa pagkalooy kanato sa atong mga kaluyahon, hinonoa usa siya nga sa tanang paagi gitintal ingon kanato, hinoon wala makasala.”

Hebreohanon 2:17: “Busa gikinahanglan nga pagahimoon siya nga sa tanang kahimtang mahisama sa iyang mga igsoon, aron mahimo siyang maloluy-on ug kasaligang labawng sacerdote diha sa pagpangalagad alang sa Diyos, sa paghimog halad-pasiuli alang sa mga sala sa katawhan.”

Ang pag-antus nga naaguman ni Kristo tungod sa tentasyon, mao ang pagpakiggubat batok niini ug gigamit Niya ang tanang gahum sa Iyang pagkamao aron sa pag gunit sa Iyang pagbuot, gipugos Niya nga modumili ug makadaug sa tentasyon; gipili Niyang mosunod sa kabubut-on sa Diyos sa tanang butang, ug dayon sa paglakaw nga nagabuhat sa kabubut-on sa Diyos.

Our High Calling (OHC) p. 107 (Manuscript 48, 1899): “Si Pablo miingon, ‘Ako gilansang kauban kang Kristo... Gal. 2:20,’ walay laing mas lisod pa kay sa paglansang sa kabubut-on. Si Kristo gitental sa tanang punto sama kanato; apan ang Iyang kabubut-on gibutang Niya kanunay sa kilid sa kabubut-on sa Diyos. Sa Iyang pagkatawhanon, aduna Siya’y libre nga kabubut-on sama kang Adan didto sa Eden. Mahimo unta Niyang tumpangan ang tentasyon sama kang Adan didto sa Eden. Mahimo unta Niyang tumpangan ang tentasyon sama sa pagtumpang ni Adan, ug si Adan pinaagi sa pagtuo sa Diyos ug pagbuhat sa Iyang pulog, makasupak unta sa tentasyon ingon nga gisupak kini ni Kristo. Kon buot pa ni Kristo, Iya untang mamanduan ang bato nga mahimong tinapay. Mahimo usab Siyang magpatihulog gikan sa kinatas-an sa templo. Mahimo usab Siyang moyukbo ug moampo kaniya, nga nangilog sa kalibutan. Apan sa tanang punto giangat Niya ang maninintal sa ‘nasulat na’. Siya hingpit gayud nga nagtuman sa kabubut-on sa Diyos ug ang kabubut-on sa Diyos ug nabutyag gayud sa tibuok Niyang kinabuhi...

“Kadtong nagsunod kang Kristo, kon gusto nilang mabug-os diha Kaniya, kinahanglan motugyan sa ilang kabubut-on ngadto sa Diyos.”

Si Kristo nagpakita kanato kon unsaon sa pagdaug sa tentasyon ug kini pinaagi lamang sa pagtugyan sa atong kabubut-on ngadto sa Diyos sa matag gutlo sa atong kinabuhi.

Giklaro pa gayud ni Sister White:

Bible Commentary, Vol. 4 (4BC) p. 1147 Col. 2: “Gihambin Niya diha sa Iyang kaugalingon ang hulog, naga-antus nga tawhanong kinaiya, biniay-biay ug nahugawan sa sala.”

Review and Herald Vol. 1 (IRH) p. 140 Col. 3: “Gikuha Niya ang hulog nga kinaiya sa tawo ug nakigbisog sa pag-asdang batok sa kusgan nga kaaway nga mao ang mibuntog kang Adan.”

3RH 421 Col. 2: “... Putli Siya ug wala mahugawi, apan Iyang gihambin ang atong makasasalang pagkatawo.”

Si Kristo wala magpakasala aron makaptan ang atong makasasalng pagkatawo, apan iya kining gihambin aron Iyang madaug ang makusog nga mga kahiligon nga ana-a sa atong kahiladman ug aron kini madaug Niya - Siya nga atong hingpit nga panig-ingnan.

5T 177: “Nasayran Niya kon unsa ka kusog ang mga kahiligon sa kasingkasing nga tawhanon, ug Siya motabang sa tanang panahon nga kita pagatentalon.”

Dalaygon ang Diyos! Imo bang napamalandong ang pagpaubos nga gihimo ni Kristo, diin Siya nanaog gikan sa kinatas-ang puwesto sa langit, diin ang mga angeles nagayukbo sa Iyang tiilan, nga nagahulat sa pagtuman sa Iyang dapit nga sikbit sa Amahan, ug nakig-usa sa Iyang mg linalang aron ipakita kanato kon unsaon sa pagbuntog sa tanang sala ug mga pagtental ug pagbalik ngadto sa kalooy sa Diyos. Apan adunay daghang mga kristiyanos karon nga dili makapas-an sa ilang krus ug mosunod kang Jesus.

Ang pangutana, hingpit ba ug bug-os ang kinaiya ni Kristo sa dihang gipanganak Siya? Dili!

Hebreohanon 2:19: “Kay angayan gayud Kaniya alang kang kinsa ug pinaagi kang kinsa ana-a ang tanang butang nga sa pagdala niya sa daghang mga anak ngadto sa himaya, iyang pagahingpiton ang maguugda ilang kaluwasan pinaagi sa pag-antos.”

Hebreohanon 5:8-9: “Ug bisan tuod siya anak, siya nakakat-on sa pagkamasinugtanon pinaagi sa mga butang nga iyang giantos; ug sa nahimo siyang hingpit, siya nahimong tuboran sa dayong kaluuwasan alang sa tanang magasugot kaniya.”

Spirit of Prophecy Vol. 2 (2SOP) p. 39: “Mao kadto ang mando sa Diyos nga si Kristo mokuha sa dagway ug kinaiya sa hulog nga tawo, aron Siya mahimong hingpit pinaagi sa pag-antus, ug Siya magasagubang sa kusog sa mabangis nga mga pagtental ni satanas, aron nga Siya makahibalo kon unsaon Niya sa pagtabang kanila nga pagatentalon.”

5RH 91 Col 1: “Si Kristo mianhi aron sa pagbarug diha sa ulohan sa katawhan aron sa paggama sa usa ka kinaiyang hingpit alang kanato.”

Oh, mga kaigsoonan kong lalake ug babaye, si Jesus nagmadaugon sa tanang mga tentasyon. Iya nang gibugno ang tanang mga gubat nga atong sagubangon alang sa paghingpit sa atong kinaiya, ug Siya nagmalampuson sa pagbuntog sa tanang sala pinaagi sa pagpakigbisog batok sa kusganon nga kaaway, aron nga makagawas kita sa pagkaulipon.

Mateo 12:29: “O unsaon man sa usa ka tawo ang pagsulod sa balay sa usa ka tawong kusgan ug pag-agaw sa kabtangan niini, gawas kon iya usang gapuson ang kusgan? Unya makahimo na siya sa pagpangawat sa balay niini.”

Adunay mga simbolo niini nga ato usa nga sabton. Kinsa man ang kusgan nga tawo niini? Si satanas. Unsa man ang balay sa kusgan nga tawo? Kini mao ang yutang-sakop o ginharian nga mao ang kalibutan. Giunsa man ni Kristo paggapus sa kusgan nga tawo? Nagmadaugon si Kristo sa tanang tentasyon nga gisabwag ni satanas sa iyang dalan. Gidaug ni Kristo si satanas mao nga wala na gayo’y mahimo si satanas batok kang Kristo. Diha sa Juan 14:30 si Kristo nagaingon, “ang yawa walay labot kanako.”

Unsa ma’y buot ipasabot sa pagdaut sa mga kabtangan ni satanas ug sa iyang balay? Kini mao ang pagpagawas sa mga binilanggo ni satanas lakip sa ilang mga kabtangan o kuhaon sila gikan sa iyang kontrol ug gahum (Isa. 14:12, 17). Buot ni satanas nga magpabilin kita nga iyang ulipon ug pagkagapus diha kaniya hangtud nga wala na kita’y kahimoan sa pag-ikyas. Apan wala tugoti ni Kristo nga kini mahitabo. Dili Niya gusto nga ang atong kabubut-on o pagbuot - ang kagawasan sa pagpili kon kinsa ang atong alagaron - maguba. Iyang gisiguro nga kining gahum sa pagpili pagagamiton sa tanang katawhan.

Mount of Blessing (MB) p. 62: “Walay tuyo ang Diyos nga ang atong kabubut-on maguba, tungod kay pinaagi lamang sa paggamit niini, kita makahimo sa pagbuhat sa Iyang buot ipabuhat kanato. Atong itugyan kaniya ang atong kabubut-on aron ato na usab nga dawaton kini nga naputli ug nahapsay na, ug nalambigit sa pakig-duyog sa diosnon aron ikabubo Niya pinaagi kanato ang kinanindotan nga dahilig sa Iyang gugma ug gahum. Bisan unsa ka pait ug kasakit ang bation niini nga pagtugyan alang sa masupakon, danghag nga kasingkasing apan kini may kapuslanan alang kanimo.”

Giluwas kitani Kristo gikan sa gahum sa yawa ug sala, naghatag Siya’g hingpit nga sumbanan alang sa pagbuntog sa sala ug paghingpit sa atong mga kinaiya. Makahimo kita niini. Apan gikinahanglan natong itugyan ang atong kaugalingon ngadto sa Diyos, magadani ngadto kaniya, ug makasabot kita sa gahum sa kabubut-on.

Letter 24a Jan 27, 1890 (MR# 448 p. 12-13): “Ang kuta sa sala mao ang kabubut-on.”

Apan adunay mga tawo nga wala makahibalo kon unsaon sa paghatag sa ilang kaugalingon ngadto kang Jesus ug mapadani ngadto kaniya, pagkahimugso pag-usab pagbaton sa bag-ong kasingkasing.

Manuscript 36, Sept 19, 1891 (MR 551p. 3): “Unsa man ang bag-ong kasingkasing? Mao kini ang bag-ong panghunahuna. Unsa ang panghunahuna? Mao kini ang kabubut-on. Asa man ang imong abubut-on? Kini mahimong anaa sa kiliran ni satanas o sa kiliran ni Kristo. Anaa ra kini kanimo. Ibutang mo ba ang imong kabubut-on sa kiliran ni Kristo? Mao kana ang bag-ong kasingkasing. Mao kana ang bag-ong kabubut-on, usa ka bag-ong panghunahuna, ‘usa ka bag-ong kasingkasing ang ihatag ko kanimo!’ Busa magsugod kita gikan dinhi.

“Ang pagkakabig yano, yano ra kaayo. Magsugod kita dinhi sa pagduol nganha sa ginharian sa langit. Unsaon? Sama sa usa ka gamay’ng bata. Sama ra gayud niini ka yano. Mahimong makuha mo ang kahibulongan sa bag-ong pagkatawo, apan dili ka makapasabot niini kang bisan kinsa, ni ikaw mismo. Apan ang labing maayong paagi alang kanimo mao ang paghatag sa imong panghunahuna kang Jesu-Kristo, ug ang panghunahuna mao ang kabubut-on.”

SC 46-47: “Daghan ang nagapangutana, ‘unsaon man nako ang pagtugyan sa akong kaugalingon ngadto sa Diyos?’ Nagtinguha ka sa paghatag sa imong kaugalingon ngadto Kaniya, apan mahuyang ka sa gahum moral ug pinugngan ka sa mga pangginawi sa kinabuhing masalaypon. Ang imong mga panaad ug mga tinguha nahisama sa lubid nga balas. Dili mo mapugngan ang imong mga panghunahuna, pagkamadali-dalion, ug imong mga gugma. Ang kasayuran sa imong naguba nga mga gugma. Ang kasayuran sa imong naguba nga mga saad ug wala matuman nga mga panumpa mao’y hinungdan sa imong pagbati nga ang Diyos dili makadawat kanimo; apan walay kinahanglan nga mawad-an kag paglaum. Ang kinahanglan mo lang nga masabtan mao ang tinuod nga kusog sa kabubut-on. Mao kini ang gahum nga nagamando sa kinaiya sa tawo, gahum sa desisyon o sa pagpili. Ang tanang butang nag-agad sa husto nga aksyon sa kabubut-on. Gihatag sa Diyos ngadto sa tawo ang gahum sa pagpili; ana-a kanila ang paggamit niini. Dili ka makausab sa imong kasingkasing, sa imong kaugalingon, dili ka makahatag sa imong paghigugma ngadto sa Diyos; apan makapili ka sa pag-alagad Kaniya. Ikahatag nimo Kaniya ang imong kabubut-on; unya Siya dayon makahimo diha kanimo sa pagbuot ug sa paghimo uyon sa Iyang kaugalingon nga kahimuot. Sa ingon niini ang imong tibuok nga kinaiya mahimutang ubos sa pagmando sa Espiritu ni Kristo; ang imong gugma masentro diha Kaniya, ang imong panghunahuna mahiuyon Kaniya.

“Ang tinguha alang sa pagkamaayo ug pagkablaan, maayo, apan kon mohunong ka dinhi, dili kini makahatag kanimong kaayuhan. Daghan ang mangawala samtang sila nagapangandoy ug nagatinguha nga mahimong kristohanon. Wala sila moabut sa lugar diin ilang gitugyan ang ilang kabubut-on ngadto sa Diyos. Wala nila gipili karon ang pagka kristohanon.

“Pinaagi sa hustong paggamit sa kabubut-on, adunay kinatibuk-an nga kausaban sa imong kinabuhi ang mahitabu. Tungod sa pagtugyn mo sa imong kabubut-on ngadto kang Kristo ikaw nagpasakop sa gahum nga labaw pa sa tanang mga punoan ug mga gahum. Makabaton ka ug gahum gikan sa kahitas-an aron dili ka matarug, ug dayon pinaagi sa makanunayon nga pagtugyan ngadto sa Diyos, makahimo ikaw sa pagkinabuhi sa bag-ong kinabuhi, bisan pa sa kinabuhi nga matinuohon.”

Dili masayon ang pagbuntog sa atong mga pagginawi ug mga hulmahan sa sala, ug pagpaningkamot sa pagsulod sa mapit-os nga ganghaan. Gikinahanglan gayud niini ang tanan nga gahum ug kusog nga gihatag sa Diyos kanato aron nga masangputanon natong magamit ang atong kabubut-on ug magmadaugon kitang makigbisog batok sa mga kasal-anan nga dali ra kaayong mopiit paglikos kanato. Kadto lamang ang mobuhat niini ang makabaton sa ginharian sa langit.

1T 397: “Si Satanas ug ang iyang mga panon makiggubat batok sa gobiyerno sa Diyos ug ang tanan nga adunay tinguha sa pagtugyan sa ilang mga kasingkasing ngadto Kaniya (Sa Diyos) ug motuman sa Iyang mga kasuguan, sulayan gayud ni satanas sa paglibog ug pagdaug pinaagi sa iyang mga pagtintal aron sila mawad-an ug paglaum ug dili na makigbisog.”

Gisultihan kita ni Jesus niining gubat nga nagaugmad karon ug gisultihan usab kita Niya kon kinsa ang makadaug niini.

Mateo 11:12: “Sukad sa mga adlaw ni Juan nga Bautista hangtud karon ang ginharian sa langit naka agum sa paglugos, ug kini gina agaw sa manglulugos pinaagi’g kusog.”

Unsa’y buot ipasabot niini? Unahon usa nato paghatag ug kahulugan ang mga pulong. Asa man ang ginharian sa langit? Literal ba kini o espiritual ba hinoon?

Lucas 17:20-21: “Ug sa gipangutana Siya sa mga Fariseo kon kanus-a moabot ang ginharian sa Diyos, Siya mituban kanila, ang ginharian sa Diyos, moabut dili paga-ubanan sa mga tilitmad-on nga mapaniid; ug dili usab sila magaingon, ‘Dia ra! O tua ra! Kay tan-awa ra ang ginharian sa Diyos anaa ra sa sulod ninyo.”

Busa ang ginharian sa Diyos ania sa sulod ato. Unsa ma’y buot ipasabot sa paggamit ug kusog aron sa paglugos sa pagkuha niini? Ang paglugos magaikan sa paggamit sa tanan mong gahum sa pagdumog palayo sa sala, ug ginamit ang kusog sa imong kabubut-on aron mabatnan ang ginharian sa langit.

5BC 1089 col. 2: “Kauban sa dagkung mga kamatuoran nga natugotan kita sa pagdawat, kinahanglan nga kita ilalum sa gahum sa Balaang Espiritu mangahimong buhi nga agianan sa kahayag. Unya maka-paduol kita sa lingkuranan sa kalooy ug makakita sa balangaw sa saad ug magaluhod uban sa mapainubsanon nga kasingkasing ug mangita sa ginharian sa langit uban sa epirituhanong paglugos nga makadala gayud sa iyang ganti. Ato gayud kining kuhaon pinaagi sa kusog sama sa gibuhat ni Jacob.”

Unsa’y buot ipasabot sa “kuhaon pinaagi sa kusog sama sa kusog ni Jacob?” Unsa ma’y gibuhat ni Jacob?

1BC 1905 col. 2: “Si Jacob nahadlok ug nalusno samtang nanlimbasog siya pagbaton ug kadaugan pinaagi sa iyang kaugalingon kusog. Nasaypan niya nga usa ka kaaway, ang langitnong bisita ug siya nakigbisog kaniya samtang aduna pa siya’y nahibiling kusog. Apan sa iyang gitambog ang iyang kaugalingon ngadto sa Diys, iyang nasapnan nga imbes modangat siya sa mga kamot sa usa ka kaaway, gilibutan na hinuon siya sa mga bukton sa walay kahangturang gugma. Nakita niya ang Diyos nawong sa nawong ug ang iyang mga kasal-anan gipasaylo. ‘Ang ginharian sa langit nakaagum na sa paglugos, ug kini ginaagaw sa manlulugos pinaagi’g kusog!’ Kini nga panglugos nagsakop sa tibuok kasingkasing. Ang pagkamaduha-duhaon mao usab ang pagkahuyang. Ang tinguhang hugot, pagdumili sa kaugalingon, ug ginahin nga paninguha mao’y gikinahanglan alang sa buhat sa pagpangandam. Ang salabutan ug ang konsensya mahimong maghiusa; apan kon ang kabubut-on dili paga gamiton, kita mapakyas. Ang tanang gahum nga lawasnon ug sa pangisip ug pag-ampo kinahanglan nga mao’y moilis sa kaluya ug sa ka walay-pagtagad. Tungod lamang sa mainiton ug hugot nga paninguha ug pagtoo sa katakus ni Kristo, kita makadaug ug makaangkon sa ginharian sa langit. Mobo ra ang atong panahon sa pagbuhat. Duol na ang ikaduhang pag-anhi Kristo.”

Letter 16f, May 9, 1892 (MR #995, p. 7-9): “Gikinahanglan nga mosulod kita sa mapit-os nga ganghaan. Gipahimutang ni satanas ang iyang mga kugihang ahente sa agianan aron sa pag-ali sa dalan sa matag usa. Gipadasig ni Kristo ang Iyang mga sumusunod aron dili sila mahadlok. Dasdas, paninguha sa paglusot. ‘Panlimbasugi ninyo ang pagsulod agi sa pultahan nga masigpit; kay suginian ko kamo, nga daghan ang maninguha sa pagsulod apan dili makahimo.’ Lukas 13:24. Kinahanglan isalikway ang mga gimihal ug gitipigan nga mga diyosdiyos, ug ang mga sala nga gipatuangan, bisan pa nga hapit nalang lugiton ang tuong mata o pution ang tuong kamot. Magbangutan! Panglugos nga makaagi ka lusot sa mga kasundalohan sa impiyerno nga nagsupak sa imong alagian.

“O! Kinahanglan magmainiton gayud kita sa pagpasabut sa tanang katawhan nga adunay langit nga pagadag-on ug impiyerno nga pagalikayan. Ang tanang kusog sa kalag kinahanglang pukawon aron sa pag-panglugos nga makaagi ug masakmit ang ginharian pinaagi sa kusog. Abtik si satanas ug kinahanglan magmaabtikon usab kita. Si satanas walay pagkakapoy ug siya makanunayon ug kinahanglan mao usab kita. Wala nay panahon sa pagpangatarungan ug pagpamasangil ngadto sa uban sa atong pagbalik sa pagpakasala; wala nay panahon karon sa pag ulo-ulo sa kaugalingon nga kon mauyonon pa unta ang kahigayunan, daw unsa kaha ka maayo ug kasayon alang kanato sa pagbuhat sa mga buluhaton sa Diyos. Kinahanglan nga atong sultihan bisan kadtong nag-ingon nga sila tumotuo kang Kristo, nga undangon na nila ang pagpakaulaw sa Diyos pinaagi sa ilang masalaypon nga pagpangatarungan.

“Giandaman na ni Jesus ug pamaagi ang tanang emerhensya. Kon sila mosubay sa dalan nga Iyang ginalakwan, himoon Niyang patag ang dalan nga batsehon. Tungod sa Iyang kasinatian, Siya magahimo ug maayo nga kahimtang alang sa kalag. Sirhan Niya ang pultahan ug dalon Niya ang tawo ngadto sa lugar nga sila rang duha sa Diyos, ug ang nanginahanglan nga tawo kinahanglan makalimot siya kang bisan kinsa ug bisan unsa gawas lamang sa Diyos. Si satanas makigsulti kaniya apan kusgi ang imong pagpakigsulti sa Diyos, ug Siya maga-abog sa yawan-ong anino ni satanas. Uban ang mapainubsanon, mahupay ug mapasalamaton nga kasingkasing sila motuaw nga naga-ingon, ‘Ang Imong kaaghop maoy nagpadaku kanako.’ Ang tawo nga tinuod nga nangita mobutho gikan sa pagpakighiusa sa Diyos, tugob sa kasigurohan sa Iyang gugma, aron sa paglakaw nga naga bisibis sa usa ka langitnong nga pag-ampo bisan asa siya paingon. Makahimo siya sa pagsulti mahitungod sa pagkamatarong ni Kristo; makahimo siya pag hisgut mahitungod sa gugma sa Diyos uban ang sinseridad. Siya nagsalig ug nahibaloan niya nga ang Diyos maayo.”

Ang 1Cor 9:25 ug mga Buhat 14:22 nagasulti kanato sa mao gihapon, nga kinahanglan manlimbasug kita alang sa pagka mapinugnganon, ug pinaagi sa daghang mga kasakit mosulod kita sa ginharian sa Diyos. Apan sa dili pa kita makabaton ug kadaugan, kinahanglan itugyan nato ang atong kabubut-on ngadto sa Diyos ug magpakombertir ngadto sa Iyang serbisyu.

Samtang kita magpabilin nga hakog, dili-kombertido ug walay pagkadiyosnon, wala gayud kita’y gahum sa pagtindog batok sa mga tentasyon. Ug dinhi niining dili-kombertido nga kondisyon, ang atong pagkamatarung sama ra sa mahugaw nga trapo.

Isaias 64:6: “Kay kami nga tanan nangahimo nga ingon sa usa nga mahugaw, ug ang tanan namo nga pagkamatarung ingon sa usa ka saput nga nahugawan. Ug kaming tanan mangalaya ingon sa usa ka dahon; ug ang among mga kasal-anan, sama sa hangin, nagapalid kanamo.”

MB 54: “Usa ka imposibiliad alang sa tawo, ang pagbantay sa kasugoan sa Diyos, sa iyang kaugalingon; tungod kay ang kinaiya sa tawo dautan, hiwi ug lahi gayud sa kinaiya sa Diyos. Ang mga buhat sa hakog nga kasingkasing maoy sama sa mahugaw nga butang; ug ang tanan natong pagkamatarung gitandi sa mahugaw nga mga trapo.”

Tungod kay ang dili-kombertido o ang hakog wala may gahum aron sa pagtindog batok sa mga tentasyon, sa unsa mang kahimtang kita mahimutang kon wala kita’y kusog nga makatindog? Di, nakahigda kita. Niini nga kahimtang, unsaon man nato sa pagduol ngadto sa tilian sa krus aron makombertir ug mapamatarung sa pagtan-aw sa Diyos? Dili man kita makalakaw padulong didto kay wala man kita’y igong kusog. Unsaon man nato pag-abot sa tilian sa krus?

Juan 12:32: “Ug ako, kon pagabayawon ako gikan sa yuta, magakabig sa tanang tawo nganhi kanako.”

Ang pulong Greco gigamit dinhi sa “pagkabig” literal nga nagakahulogan “pagguyod” ug kon naka hayang kita nga walay kusog sa pagbangon ug paglihok, mao lamang kini ang pamaagi aron maka-abot kita didto.

Letter 135, 1898 (MR #99 p. 26): “Ang tawo walay kahimo-an sa pagpaningkamot alang sa iyang kaluwasan gawas sa gahum sa balaang pamaagi, ug ang Diyos dili magabuhat alang sa tawo niadtong gisugo Niya sa tawo nga pagabuhaton alang sa iyang kaugalingon, pinaagi sa iyang kaugalingon mainton ug kinabubut-on nga pagduyog. Ang tawo adunay kinatibuk-an nga pagsalig sa Diyos sa Iyang buluhaton sa pagluwas sa kalag. Dili siya makahimo, sa iyang kaugalingon lang sa paglakang paingon kang Kristo gawas nga kabigon siya sa Espiritu sa Diyos, ug kini nga pagkabig makanunayon, ug magapadayon hangtud nga pasub-on sa tawo ang Balaang Espiritu pinaagi sa iyang mapugsanon nga pagdumili.” (1SM 130-1).

Makabig ba kita ngadto sa krus kon dili nato gusto? Dili gayud. Kinahanglan kinabubut-on gayud nato nga magpakabig ngadto sa krus. Ang kadugayon sa atong pag-abot didto nag-agad sa atong kabubut-on sa pag-abot didto.

Kon didto na kita, atong makita ang atong gilapdusan ug duguon nga Manluluwas nga nagbitay didto, ug atong bation nga “tungod sa akong sala kini nahitabu sa akong Manluluwas ug akong Diyos.”

Sa dihang makamatngon kita sa pagkangil-ad sa sala ug mangayo’g pasaylo, ug magasugid ug maga salikway sa atong mga sala, ang 1 Juan 1:9 mahimong usa ka hamiling saad, ug ang Diyos maga pasaylo sa atong mga sala ug pagamatarongon kita Niya sa Iyang panan-aw. Iya dayon kitang hatagan sa kusog ug grasya aron sa pagtindog, ug pagpakigbisog sa mga gubat sa Diyos aron sa pagbuntog sa sala.

Kita mapanganak pag-usab o mahimong kombertido, ug ang liso ni Kristo napugas na sa sulod nato. Tungod niini dili na “mahugawng trapo” ang atong pagkamatarung, ug makahimo kita sa buluhaton sa pagkamatarung, nga nagapadayon sa paagi sa pagpakabalaan.

Manuscript 16, Feb 10 1898 (MR #599 p. 3): “Ang anak sa Diyos mikunsad dinhi sa atong kalibutan sa tawhanon nga porma aron sa pagpakita sa katawhan nga ang panaghiusa sa diosnon ug tawhanon dili na magpakasala.”

Kon nakombertit na kita ug nagapaingon na sa pagpakabalaan unsa pa may atong buhaton?

Sons and Daughters of God (SD) p. 22: “Paglakaw diha sa kahayag.’ Ang paglakaw diha sa kahayag nagakahulogan nga magtapat (resolve) sa paggamit sa hunahuna, paggamit sa gahum sa kabubut-on, sa mainiton nga paninguha sa pagrepresentar kang Kristo diha sa katam-is sa kinaiya. Nagkahulugan kini nga isalikway ang tanang kangitngit. Dili ka magpahulay nga tagbaw na nga magaingon. ‘Anak ako sa Diyos.’ Nagasud-ong ka ba kang Jesus ug pinaagi sa pagsud-ong nagakausab ka ba ngadto sa pagka may-ong Kaniya? Ang paglakaw diha sa kahayag nagakahulugang nagauswag ug nagatubo diha sa espiritual nga mga kalab-oton. Si Pablo miingon, ‘Dili nga nakab-ot ko na kini o nahingpit na ako; apan... gina kalimtam ko ang nanang pangagi na,’ kanunayong gina-sud-ong ang panig-ingnan, nagadusdus ako apingon sa unahan.’ Ang paglakaw diha sa dalan sa Ginoo, paglakaw pinaagi sa pagtuo; paglakaw diha sa Espiritu, - paglakaw diha sa kamatuoran, paglakaw diha sa gugma, paglakaw diha sa bag-o nga kinabuhi.’ Mao kini ang ‘paghingpit sa pagkabalaan diha sa kahadlok sa Diyos!”

Letter 135, 1898 (MR #99 p. 27): “Ang Espiritu sa Diyos wala naga tanyag sa pagbuhat sa atong pahat bisan sa pagbuot ni sa pagbuhat. Mao kini ang buluhaton sa tawhanong ahente diha sa iyang pagduyog uban sa mga Balaang tinugyanan, nga sa dihang ikiling nato ang atong kabubut-on sa Diyos, ang grasya ni Kristo mopatigbabaw aron sa pagpakigduyog sa tawhanong ahente; apan dili kini maoy puli sa pagbuhat sa atong buluhaton nga makinaugalingonon sa atong pagtapat ug pagbuhat nga wala nay pagsibug; busa dili ang kadaghanon sa kahayag, ug nagpatongpatong nga ebidensya ang makakabig sa kalag. Kini lamang mao ang tawhanong ahente nga nagadawat sa kahayag sa kahayag, nga nagapukaw sa kusog sa kabubut-on, nga nagapamatuod ug naga-ila nga kadtong iyang nahibaloan mao ang pagka matarung ug kamatuoran ug nagaduyog uban sa langitnong nga pag-alagad nga gigahin sa Diyos aron sa pagluwas sa kalag... gawas lamang nga ikiling sa tawhanong ahente ang iyang kasingkasing sa pagbuhat sa kabubut-on sa Diyos, ug mag-alagad siya sa Diyos, sayang lamang ang kahayag. Walay mahimo ang usa ka libo ka pilo nga dugang nga kahayag ug pagtuo. Ang Diyos nasayod nga aduna na Siya’y igong kamatuoran. Aduna sila’y Moises ug mga manalagna. Kon dili man sila motuo sa ilang pagpamatuod ug motindug aron sa pagbuhat, dili usab sila motuo bisag aduna pay usa nga ipadala kanila nga gikan sa kamatayon.”

Ang uban nagtuo nga ang grasya sa Diyos ginahatag kanila aron sa pagtabang kanila sa pagdaug sa tentasyon sa dili pa nila suklan ang maong tentasyon. Dili kini mao. Busa kon ang tentasyon moduol kanato, molakang kita aron sa pagsukol niana nga tentasyon aron ang grasya ug gahum gikan kang Kristo makaduyog kanato ug hatagan kita sa kadaugan.

My Life Today (MLT) p. 100: “Aduna lamang usa ka gahum nga makadala kanato ngadto sa pagpasig-uyon sa pagkamay-ong kang Kristo, nga makahimo kanatong lig-on ug walay pagka-usab. Kini mao ang grasya sa Diyos nga naga-abut kanato pinaagi sa pagtuman nato sa balaod sa Diyos.”

Aduna kitay hingpit nga panig-ingnan niining tibuok nga pamaagi nga makita sa Bibliya. Ang una mao ang kasinatian didto sa Pulang Dagat.

Ang mga anak sa Israel miabut sa Pulang Dagat, ug naulang ang ilang pagtabok niini. Ang mga Ehiptohanon anaa na sa likod nila ug daw wala gayod silay kaikyasan. Lupig kaayo sila sa ilang kusganon nga kaaway. Apan unsay gibuhat sa Ginoo? Gipapadayon Niya sila paglakaw ug ang mga anak sa Israel, pinaagi sa pagtuo, mitunob usa sila sa tubig sa wala pa gipakita kanila ang gahum sa Diyos ug dayon miabli ang tubig ug gidala sila ngadto sa kadaugan batok sa ilang mga kaaway. (Tan-awa sa pp. 270).

Ang lain na usab nga kasinatian mao ang sa suba sa Jordan, mao gihapon ang nahitabo. Gikinahanglan ang mga anak sa Israel mopakita sa ilang pagtuo sa Diyos, ug tungod sa pagtuo mohimo sa unang tikang aron sa pagtuman sa Diyos ug pagdaug sa sagabal nga nagbabag sa ilang pagpadayon.

Ug karon, unsa kaha, kon samtang anaa kita niining kombertido, napangaak pag-usab nga kasinatian... kita motugyan sa atong kabubut-on ngadto kang satanas ug pilion nato ang pagpakasala - unsay mahitabo? Mahulog na usab kita gikan sa atong kombertido nga kundisyon ngadto sa dili-kombertido, ug ang mahugaw-nga-trapo nga kasinatian magsugod na usab.

Desire of Ages (DA), p. 300: “Sa matag pagpakasala si Jesus nasamaran pag-usab.”

MB 10: “Iyang gilansang pag-usab ang anak sa Diyos ug gidunggab na usab kadtong nagadugo ug nasamaran nga kasingkasing.”

O, mahal kong kaigsoonan. Kinahanglan dag-un nato ang atong mga sala ug moundang na sa paglansang pag-usab sa atong Manluluwas. Kinahanglan atong mapugngan ang atong kabubut-on.

Letter 24a, Jan 26, 1890 (MR# 448 p. 12-13): “Ang kuta sa sala mao ang kabubut-on. Ibutang ang imong kabubut-on sa kiliran sa Diyos, ayaw na ibutang ang imong kaugalingon sa dapit sa pagkamasalaypon..."

Fundamentals of Christian Education (FCE, p. 132): “Ngano man nga ang atong mga batan-on ug bisan pa kadtong mga hamtong, dali ra man kaayong matental ug magpakasala? Tungod kay ang pulong sa Diyos wala man tun-i ni gibutang sa hunahuna nga mao man unta ang pagabuhaton. Kon gihatagan unta kini ug bili, makabaton unta ang tawo ug pagkamatarung sa sulod niya, usa ka kusog sa espiritu, nga makasukol sa tentasyon ni satanas batok sa paghimog dautan. Ang usa ka lig-on, mapaninguhaon nga gahum - sapagpili dili madala sulod sa kinabuhi ug kinaiya tungod kay ang balaan nga panudlo sa Diyos wala man gihimo nga pagtulon-an, ni suheto sa pamalandong. Wala may paninguha nga kinahanglan ang hunahuna ipa-uban-uban sa putli ug balaan nga panghunahuna, ug aron ipasimang kini gikan sa dili putli ug bakak. Walay pagpili sa labawng maayong bahin, ang paglingkod sa tiilan ni Jesus sama sa gihimo ni Maria, aron sa pagkat-on sa labing balaang mga pagtulong-an gikan sa diosnong Magtutudlo, aron kini pagatigumon sa kasingkasing, ug pagakinabuhian sa adlaw-adlaw. Ang pagpamalandong sa balaang mga butang maoy makapabayaw ug makapaputli sa hunahuna, ug makahimog kristohanon nga babaye ug lalaki,” (Tan-awa usab sa 5T 513-5).

FCE 134: “Ang tanang mahunit nga sala kinahanglang isalikway. Kinahanglan pagagubaton kini hangtud mabuntog. Ang Ginoo motabang sa imong mga paninguha. Samtang ang limitado ug makasasalang tawo manlimbasug alang sa iyang kaugalingon kaluwasan uban ang pagkahadlok ug pagkurog, ang Diyos mao ang magapalihok sa sulod niya sa pagpatinguha ug pagpapaningkamot alang sa Iyang kaugalingon kahimuot. Apan ang Diyos dili molihok kon walay pagduyog ang tawo. Kinahanglan iyang gamiton ang iyang mga gahum hangtud sa utlanan; kinahanglan ibutang niya ang iyang kaugalingon ingon nga andam ug masugtanon nga estudyante sa tunghaan ni Kristo; ug sa dihang dawaton niya ang grasya nga gitanyag kaniya nga walay bayad, ang presensya ni Kristo diha sa hunahuna ug kasingkasing maoy mohatag kaniya ug desisyon sa tuyo nga ikahikling ang tanang kabug-aton sa sala, aron nga ang kasingkasing mahimong masangkap sa tanang pagkapuno sa Diyos, ug sa Iyang gugma.”

1RH 291 Col 3: “Ang Diyos dili mogamit sa tawong walay-pag-tagad. Ang mga ministro usahay mosulti sa katawhan nga walay lain nilang buhaton kon dili motu-o lamang; nga natapos na ni Jesus ang tanan, ug walay bili ang ilang binuhatan. Apan ang pulong sa Diyos klaro nga nagaingon nga sa paghukom ang timbangan sibo gayud nga balansihon, ug ang paghukom gipasikad sa ebedensya nga ikapakita... Ang atong paninguha sa buluhaton sa pagkamatarung, alang sa atong kaayuhan ug alang sa kaluwasan sa mga kalag, adunay dakung impluensya alang sa atong balus....

“...Ang matag tentasyon nga gisuklan maoy usa ka bililhon nga kadaugan nga napanag-iya tungod sa pagbuntog sa kaugalingon; kini naga pabawog sa mga gahum alang sa pag-alagad kang Jesus, ug nagapadugang sa pagtuo, paglaum, pailub, ug pagkamainantuson.” (Tan-awa sa SD 285, 118 o Youth Instructor, 9-24-1894).

Gikahatagan kita ug hataas nga pribelihiyo sa pag-ugmad sa hinatagsa-Diyos nga mga kaakuhan sa atong hunahuna ngadto sa kinatas-ang makab-ot nga kaugmaran. Unsa ka taas kana?

ED 123-25: “Alang sa pangisip ug sa kalag, maingon man usab sa lawas, kini mao ang balaod sa Diyos nga ang kalig-on mapanag-iya pinaagi sa paningkamot. Ang paggamit mao ang pagpalambo. Sa paguyon niini nga balaod, ang Diyos nagsangkap, diha sa Iyang pulong sa mga pamaagi sa pagpa uswag sa mental ug espiritual.

“Sa pagtuki sa nagkalain-laing bahin ug pagtuon sa ilang relasyon sa usag-usa, ang kinatas-ang mga kaakuhan sa tawhanong pangisip ginapukaw alang sa mainiton nga kalihukan. Walay bisan kinsa nga nagahimo niini nga pagtuon nga dili mabaid ang gahum sa pangisip.

“Siya nga adunay sinsero ug matudloan nga espiritu nga nagatuon sa pulong sa Diyos, nagapangita nga makasabut sa kamatuoran niini, siya pagadad-on ngadto sa Tagsulat niini; ug gawas lamang sa iyang kaugalingon nga pagpili, wala gayoy utlanan sa iyang pag-uswag.”

Unsa man kana kataas?

ED 18: “Hataas pa kay sa kinatas-ang maabut sa tawhanon nga panghunahuna maoy tinguha sa Diyos alang sa Iyang mga anak, Ang pagkadiosnon - pagka may-ong sa Diyos - mao ang kalab-oton nga pagakab-oton.”

Hinumdumi nga siya nag-ingon nga “gilalang sa Diyos ang tawo aron nga ang matag kaakuhan mahimo unta nga kaakuhan sa diosnong pangisip...” COL 355.

Higala, mao kini ang kinatas-ang kalab-oton alang kanato, nga ato untang mapauswag ang atong mga lawasnong kaakuhan ug kinaiya aron atong maipakita ang hunahuna ug kinaiya sa atong manlalalang nga Diyos!

Apan makapili kita nga dili mosunod sa kinatas-ang kalab-oton alang kanato.

This Day With God p. 350: “Ang matag sala, matag aksyon nga dilimatarong, matag paglapas sa kasugoan sa Diyos nagpadayag sa usa-ka-libo-ka-pilo nga dugang kusog nganha sa nagabuhat kay sa nagantus. Sa matag panahon nga ang usa sa mga mahimayaong kaakuhan nga gituga sa Diyos sa tawo pagaabusohan o gigamit sa sili husto, kana nga kaakuhan matipakan sa iyang kabaskog ug dili na gayud mobalik sa kanhi nga wala pa kini pasipad-i. Ang matag pasipala nga ipaantus nato sa atong moral nga kinaiya niini nga kinabuhi, mabatian pa dili lamang sa dugay nga mga panahon kon dili hangtud sa walay katapusan. Bisan pag pasayloon sa Diyos ang makakasala apan ang eternidad dili modugang o molis sa kinabubut-on nga pag-usik nga gitagamtam dinhi niining kinabuhi-a. Ang pag-abut ngadto sa sunod - ang umalabot nga kinabuhi nga nakuhaan ug katunga sa gahum nga madala unta didto maoy usa ka makalilisang nga panghunahuna. Ang mga adlaw sa pagsulay nga nawala samtang naga kab-ot sa katakus alang sa langit maoy usa ka makalilisang nga panghunahuna. Ang mga adlaw sa pagsulay nga nawala samtang naga kab-ot sa katakus alang sa langit maoy usa ka kawad-on nga dili na gayud mabalik. Ang katakus sa paglingaw-lingaw mahimong kulang unya didto sa umalabut nga kinabuhi tungod sa mga yawan-ong pagginawi ug gipasipad-an nga gahum moral niining kinabuhi-a. Bisan unsa pa kataas ang atong makab-ot sa umalabut nga kinabuhi, mopataas pa unta kita nga mopataas kon ato lang untang gipahimuslan ang kaayuhan ang gihatag sa Diyos kanato nga mga katungod ug bulawanon nga mga kahigayunan alang sa pagpauswag sa atong mga kaakuhan dinhi niining sulay-nga-pagkinabuhi.”

Kinsa may moduyog kanako sa pagpaninguha “sa pagsulod sa mapit-os nga ganghaan” “nga mobarung nga malig-on sa usa ka epiritu, usa ka hunahuna nga naga paningkamot tungod sa pagtuo sa ebanghelyo” tungod kay “wala kamo nakigbatok sa dugo, nagapakigbisog batok sa sala... busa ituboy ang inyong mahoyhoy nga mga kamot, ug lig-ona ang inyong mahuyang nga mga tuhod; ug magbuhat kamog matul-id nga alagianan alang sa inyong mga tiil, kay basig ang mga bakol mahisalaag sa dalan; apan himoa hinoon kini nga mamaayo.”

“Panlimbasugi ang pagpakigdinaitay uban sa tanang tawo, ug ang pagkabalaan, nga kon wala kini walay bisan kinsa nga makakita sa Diyos,” “ug karon himoa ang pagbuhat niini; nga ingon nga adunay pangandam sa kabubut-on, aduna usay kahimoan gikan nianang anaa kanimo.”

“Sa katapusan mga kaigsoonan ko magmalig-on kamo diha sa Ginoo, ug sa kusog sa Iyang gahum. Isul-ob ang tibuok nga hinagiban sa Diyos aron makabarug kamo batok sa mga malipat-lipatong kaugdahan sa yawa... Busa pugngi gayud ninyo ang inyong ginabarugan sa mabinaksan ang inyong hawak sa kamatuoran ug sa masul-oban kamo sa kotamaya nga mao ang pagkamatarung, ug sa masinapinan ang inyong mga tiil sa pangandam sa maayong balita sa kadaitan; ug dugang sa tanan dad-a ninyo ang salakot nga mao ang kaluwasan, ug ang espada nga mao ang Espiritu, nga mao ang pulong sa Diyos: Pag-ampo kamo sa tanang panahon pinaagi sa Espiritu sa tanang pag-ampo ug pagpangamuyo. Alang sa maong kalab-uton, kinahanglan magtukaw kamo uban sa bug-os nga pagkamapadayonon, ug pangamuyo kamo alang sa tanang mga balaan, “Gibut-an sa Diyos ang pagpaila ngadto kanila sa kadaku gayud sa mga kadagaya sa himaya sa maong tinago alang sa himaya. Siya mao ang among ginasangyaw sa among pagpanambag sa tanang mga tawo ug sa among pagpanudlo sa tanang mga tawo diha sa tanang kaalam, aron among ika-paatubang silang tanan ingon nga mga hingkod dih kay Kristo: alang niini ako nagapangabudlay nga nagapanlimbasug sumala sa iyang kusog nga iyang gipalihok nga makagagahum gayud sa sulod nako.”

“Kay ang pagbuot sa Diyos mao kini, ang inyong pagka-binalaan: nga kamo magalikay sa pakighilawas; nga ang matag-usa kaninyo mahibalo unta unsaon niya sa pagpangasawa diha sa kabalaan ug kadungganan.” “Busa biyaan tanan ang nahaunang mga tuloohan mahitungod kang Kristo ug manag-uswag kita ngadto sa pagkahamtong; sa dili na pagpahimutang pag-usab sa sukaranan sa paghinulsul gikan sa patay nga mga binuhatan ug sa pagtuo ngadto sa Diyos.” “Si Jehovah magahingpit niadtong tanan nga mahitungod kanako.” “Ug dili niya igasikway ang buinuhat sa iyang kaugalingong kamot.”

Busa mangadto kits sa kadalanan ug sa kakoralan; ug pilita ang mga tawo sa pag-anhi dinhi aron apuno kining akong balay. Lukas 13:24, Filipos 1:27, Hebreohanon 12:4, 2 Corinto 8:11, Efeso 6:10-11, 14-18, Colosas 1:27-9, 1 Tesalonica 4:3-4, Hebreohanon 6:1, Salmo 138:8.